Col 3 | NAS | STEP | Diiꞌ teing Kumponinge Karistooꞌ ninka nariꞌ daaꞌantarurining nerakung domaang-koo. Teeꞌkoo diiꞌke kapooꞌning paning-aapening naing piarori otoriai teꞌ eeꞌnooꞌ Karistooꞌ otoinooꞌning, Kumponing-koo tampavine-koo daurarompari baꞌnanui.

Colossians 3

Niiꞌ Teing Kumponinge Karistooꞌ ninka Nariꞌ Daaꞌantamurining

1 Diiꞌ teing Kumponinge Karistooꞌ ninka nariꞌ daaꞌantarurining nerakung domaang-koo. Teeꞌkoo diiꞌke kapooꞌning paning-aapening naing piarori otoriai teꞌ eeꞌnooꞌ Karistooꞌ otoinooꞌning, Kumponing-koo tampavine-koo daurarompari baꞌnanui. 2 Diikaang noruꞌke deto basinaꞌ kapooꞌ paning-kooning noruꞌeri otomatoai, kapooꞌ kansiꞌkooning noruꞌeriaꞌ. 3 Aiꞌ diiꞌ teing kansiꞌnameng-koo dooruꞌning pinaꞌ oroꞌnuka, eeꞌnoko diikaang domaang tee Karistooꞌ ninka bakuꞌari otong Kumponing-koo. 4 Karistooꞌ tee diikaang domaang okovenung, eeꞌnoko tenang Karistooꞌ napoꞌ oroꞌparavainang diiꞌ teeꞌ nariꞌke tee ninka nariꞌ oroꞌdariainge teke sirapoꞌke Kumponing bakaang meenasi komperi.

Karistooꞌ Niiꞌkoo Domang-koo Otoko Niiꞌ Nerakaꞌmariri Oꞌnorimanaꞌ

(3:5–4:18)

Tee Urikung Aarumo Orara Niiꞌketa Tontaꞌampiai

5 Teeꞌkoo kapooꞌ kansiꞌaapening diiꞌkoo otoining booꞌantaveriai aaꞌning: kaukauro nko, noruꞌ kuꞌmiꞌ, karakaraaꞌ, mamairo, eeꞌnoko onou okoꞌoko-koong, teeꞌ teeꞌ kumponing daang-koong sionaꞌ. 6 Tee temuriiꞌ kapooꞌ nkoaamaung-koo tee Kumponinge teing taarapiikanuka kiimata-koo iira ninka poaing teꞌmung. 7 Aing teing aarumonanka diiꞌke tero nkoverikoꞌning tenang diiꞌ temuriiꞌ aarumo-koo kuung otori. 8 Teka enang aing aarumo eeꞌ oroꞌ diiꞌketa tontaꞌeriai: iira, turang, orakaꞌ mantong, pooreꞌ eeꞌnoko deuꞌ. 9 Tosireeriaꞌ otoai, aiꞌ diiꞌke tee, tee urikung onou tero tontaꞌeruꞌnung teing ninka bakaning aarumonanka ninka. 10 Enang tee diiꞌ onou nerakung deentaririning Kumponinge nkovuing, eeꞌnoko teie doong kante paari-antavumaung tee-pinaꞌ oroꞌparaaꞌnaang tee masikaꞌ kenkumperiainaꞌ. 11 Enang tee nerakaꞌdarira tankatankaang diiꞌkoo meuꞌke otoaꞌ. Kirikiꞌnupoong, Juꞌnupoong-eta tankaampariaꞌ, dopaꞌ totoꞌniiꞌnuka totoꞌpariaing-eta tankaampariaꞌ. Eeꞌnoko nantoong amutemuuꞌ namuuꞌpinaꞌ otorong. Botovotonaaꞌnuka eeꞌnoko osikaiaang nariꞌ otorong – aiꞌ Karistooꞌ tee ookara-koo nariꞌ otong eeꞌnoko teie narunge niiꞌ bakaning ookara komuri otomaung.

Otori Piaa Oroꞌantaveri otoriai.

12 Diiꞌ teing piaarurira Kumponinge bakaning meekupoong deentariri otoriiꞌnaang miruꞌdurining. Teeꞌkoo aing aaꞌning aarumo kuruntariri otoriaing: domang-eta piaa bauko, tampaꞌnko, boonko otoꞌ, dooroontoꞌ, eeꞌnoko miiꞌkui otoꞌ. 13 Narunaꞌ narunaꞌ orakaꞌ noruꞌdeeriaꞌ otorimaatoai. Niiꞌnung ninka minkuminku otoko deekoꞌ tontaꞌantareereai teeꞌ Ovoringe tontaꞌantaruruꞌnaꞌ, eeꞌnoko diiꞌka teeꞌ nariꞌ tontaꞌantareerimaatoai. 14 Eeꞌnoko ookara-koo daua piaa otoꞌderuriai, diiꞌ ookara naroꞌka dupeari narung onou deeng-antaruriainaꞌ. 15 Eeꞌnoko tee Karistooꞌketaing mooa tauraꞌperiaing teie tanataruriainaꞌ tee diikaang domang, diiꞌ eeꞌning Kumponinge bokururuꞌning tee-koo mooa-koo kuunge narung mono makosinuka deentariri, eeꞌnoko ookara batei-koo tampaꞌ tamperimaatoai.

16 Napoꞌ teeꞌ Karistooꞌ bakaang karai maantoꞌduri otoriai, aaꞌnoko diiꞌ tee mataunaꞌ nau-antareeriai eeꞌnoko tautaureeriai pakureerima, eeꞌnoko kenararimatoai teinge aaꞌninge: Daari Meekung-koo daariniiꞌnankai, nantoonge toroaamainge eeꞌnoko Tanuaang Meekunge karantavuko~ kenanankai tampara tamperima Kumponing-koo diikaang domange. 17 Eeꞌnoko aming kapooꞌnanka diiꞌke nkoveriaining, karai eeꞌnoko nko-nkoi, Ovoring Jiisuuꞌ Karistooꞌ bakaang miring-koo nkoverima Kumponing tee bauma-koo tampaꞌ tamperimaatoaing Jiisuuꞌkoo kuunge.

Nampeesiniiꞌnuka Otoroainaꞌ, Biurukaaꞌ Nariꞌ

18 Diiꞌ maniiꞌ nampeesiniiꞌnuka, diiꞌunkaampi biikaang kara arooꞌerimaatoai teeꞌ Ovoringe pia-antaruri otoinaꞌ. 19 Napoꞌ diiꞌ donkaang nampeesiniiꞌnuka diiꞌankaampi piaaverererimaatoai booniꞌ antavereriaꞌ. 20 Napoꞌ diiꞌ biurukaaꞌke diumaraang taaraverererimaatoai ookara kapooꞌnanka-koo, aiꞌ teeꞌkoo tee Ovoring dotuaramaung. 21 Diiꞌke biumaraange diurukaaꞌ iirang-antaverereriaꞌ otoai konte-antavereriꞌneenga.

Mintoong-nupoong Eeꞌnoko Tanata Nkonuka

22 Napoꞌ diiꞌ botovotonaaꞌnuka diikaning kansiꞌkooning ovontung taaraverererimaatoai ookara kapooꞌnanka-koo, tenang dutai ooraarioꞌ naroꞌ deeaꞌ tampaꞌ ooraariainaꞌ noruꞌeri, teka arooꞌdariri mintoontarimaatoai Ovoring-koo mintoonaꞌ nariꞌ, naning-koo deeaꞌ. 23 Kapooꞌ nko-nko nkoveriaing tampaꞌ diikaang domang-eta nkoverimatoai Ovoring-koo mintoompevurimaung-pinaꞌ noruꞌeri, naning-koo deeaꞌ, Ovoring-eta barenku nkaveriainaꞌ noruꞌeri tee diikaang mooꞌ; 24 Aiꞌ diiꞌ teing tee-koo Ovoring Karistooꞌkoo daiꞌdariri mintoontarimaing. 25 Teie naninge kapooꞌ orara nkovumaatoainge tee makuꞌnooꞌkoo tee orara nkavuaing, tee mooꞌ tee kapooꞌ orara nkovumaung-koo eeꞌnoko naninge baariꞌuaukaꞌnung.